GWOBRAU PRENTISIAETHAU 2023

Yn ystod prentisiaeth Annie cafodd ei chyflogi gan Gymunedau dros Waith yng Nghonwy, sefydliad sy'n cefnogi pobl leol i gael gwaith ac yn rhoi cymorth gyda thai, iechyd meddwl a goresgyn rhwystrau cyflogaeth.

Enwebwyd Annie am ei hymroddiad a'i gwaith caled yn ystod ei phrentisiaeth a'r gefnogaeth ryfeddol a gynigiodd i'w chydweithwyr a defnyddwyr y gwasanaeth, yn enwedig yn ystod y pandemig.

Rôl Annie oedd croesawu cleientiaid newydd i'r gwasanaeth a helpu dynodi'r gefnogaeth roeddynt ei hangen a threfnu hynny.

Roedd y ganolfan ar gau yn ystod y cyfnod clo ac roedd rhaid i staff weithio o adref. Roedd y gefnogaeth roedd hi'n ei darparu yn amhrisiadwy i'w thîm. Cynigiodd Annie sesiynau cymorth i aelodau staff newydd i'w cynorthwyo i ddysgu am y swydd a'r systemau'n haws ac roedd bob amser wrth law os oedd angen cymorth ac arweiniad.

Roedd gwaith Annie'n allweddol wrth newid i'r ffyrdd newydd o weithio. Er gwaethaf ymgymryd â gwaith ychwanegol gwnaeth Annie barhau i ganolbwyntio ar ei diploma - golygodd ei hymroddiad y llwyddodd i gwblhau ei diploma bedwar mis yn gynnar!

Gwnaeth y diploma helpu Annie i fagu hyder a datblygu ei gwybodaeth am y sector cymorth a chefnogaeth. Mae hi bellach wedi symud i swydd newydd gyda'r cyngor fel Swyddog Cymorth Gwasanaethau Tai.

Er gwaethaf gweithio'n llawn amser, a chydbwyso astudio a bod yn fam i ddau o blant, llwyddodd Humera i gwblhau ei Phrentisiaeth Lefel 3 mewn Rheoli yn ystod y pandemig.

O ganlyniad i'w gwaith caled cafodd Humera ddyrchafiad yn Rheolwr Canolfan Gyswllt, swydd sy'n cynnwys mwy o gyfrifoldebau rheoli.

Trwy gyfrwng y brentisiaeth datblygodd ei sgiliau a chynyddu ei hunan hyder, wnaeth ei galluogi i gyflawni ei nod o fod yn rheolwr proffesiynol.

Mae swydd gyfredol Humera yn cynnwys datblygu a gweithredu rhaglen newid sy'n berthnasol i Ganolfan Gyswllt Brechu Gogledd Cymru. Mae hyn yn cynnwys cynllunio, datblygu a gweithredu prosesau a gweithdrefnau i sefydlu'r Ganolfan Gyswllt Cwsmeriaid Corfforaethol gyntaf ar ran Bwrdd Iechyd Prifysgol Betsi Cadwaladr.

Mae Humera'n gyfrifol am bob agwedd o reoli pobl yn y ganolfan gyswllt ac mae'n anogwr effeithiol a phrofiadol sy'n arwain trwy esiampl bob amser ac yn goresgyn disgwyliadau'r cwsmeriaid yn gyson.

Mae Humera yn parhau i ddatblygu ei gyrfa, gan weithio tuag at ei chymhwyster Rheoli Lefel 4 ar hyn o bryd.

Mae Dewi wedi'i gyflogi gan Babcock International Group yn RAF y Fali. Cofrestrodd fel prentis yn 2016 a gwneud cynnydd cyflym i fod yn dechnegydd cymwysedig yn trwsio a chynnal a chadw awyrennau Hawk T2, sy'n cael eu defnyddio i hyfforddi holl beilotiaid awyrennau cyflym y dyfodol.

Yn uchelgeisiol bob amser, mae Dewi'n cyflawni ei ddyletswyddau i'r lefel uchaf posibl ac mae'n llawn cymhelliant i wneud rhagor o gynnydd a chymryd mwy o gyfrifoldeb.

Mae'n amlwg ymhlith ei gyfoedion, yn aml yn cefnogi ei gydweithwyr ac ar hyn o bryd mae'n mentora prentis newydd, gan sicrhau ei fod yn deall gwerthoedd y sefydliad a'r cyfrifoldebau sy'n gysylltiedig â rôl technegydd awyrennau.

Er mwyn datblygu ei hun cofrestrodd Dewi am brentisiaeth Diploma mewn Arwain Tîm Lefel 2, a gwblhaodd i safon uchel. Dangosodd hunan gymhelliant, nid oedd angen fawr ddim goruchwylio arno ac roedd yn cael marciau uchel iawn yn gyson. Cyflwynodd enghreifftiau rhagorol o dystiolaeth o'r gweithle i gefnogi ei ddatganiadau hefyd.

Ers hynny mae wedi mynd ymlaen i gwblhau cwrs Diploma mewn Rheoli Lefel 3 a nawr mae'n benderfynol o wneud rhagor o hyfforddiant galwedigaethol ar Lefel 4.

Adlewyrchir aeddfedrwydd Dewi yng nghyfrifoldebau ei swydd a'r modd diwyd yr aeth ati i ennill ei gymwysterau a gydnabyddir yn genedlaethol.