GWOBRAU PRENTISIAETHAU 2023

Mae James yn fyfyriwr AAT rhagorol, gyda chyrhaeddiad uchel yn gyson ac yn dangos parodrwydd i helpu eraill, yn y dosbarth ac yn y gwaith.

Ymunodd â chlwb dethol o 21% o fyfyrwyr AAT ledled y byd drwy ennill Lefel 3 gyda rhagoriaeth yr haf yma – gan ychwanegu at ei Lefel 2 gyda rhagoriaeth.

Wedi iddo fwynhau mathemateg yn yr ysgol, dywed James fod cyfrifeg yn ddewis amlwg fel gyrfa iddo a dewisodd y llwybr AAT yn hytrach na phrifysgol.

Mae’n hoff o’r amrywiaeth yn ei waith, sy’n amrywio o gyfrifiadau TAW a threth personol i gyfrifon cwmnïau cyfyngedig a chadw llyfrau. Mae’n chwarae rôl allweddol mewn hyfforddi cyflogai newydd a gwirfoddolwyr i helpu cyd-ddysgwyr.

Mae’n awyddus i herio’i hun, a bu James yn aelod o’r tîm grŵp ddaeth yn drydydd yng nghystadleuaeth Sgiliau Cyfrifeg Cymru ac mae’n gobeithio cymryd rhan yn y gystadleuaeth WorldSkills yn 2023.

Mae Matthew yn cyfuno ei astudiaethau AAT gyda gweithio i Fwrdd Iechyd Prifysgol Betsi Cadwaladr ble mae wedi mwynhau ei leoliadau gwaith sydd wedi ei alluogi i ddefnyddio’r wybodaeth a’r sgiliau y mae wedi eu hennill.

Wedi ennill AAT Lefel 2 gyda rhagoriaeth a marc llwyddiant cyffredinol o 94%, mae Matthew wedi derbyn canmoliaeth am y cyfraniad mae’n ei wneud yn y gwaith ac yn y dosbarth.

Dechreuodd ar gwrs AAT trac sydyn ym mis Chwefror 2022 ac mae wedi datblygu ystod eang o sgiliau cyfrifeg, gan ddechrau gydag adran gontractau’r Bwrdd Iechyd. Rheolodd y llif cleifion hynny oedd yn derbyn triniaeth ar gontract allanol, gan ddarparwyr allanol, gan gymryd cyfrifoldeb ychwanegol pan fu ei fentor ar absenoldeb mamolaeth.

“Mae Eleri yn ymgorffori popeth y byddech yn dymuno ei gael gan brentis – mae’n ymroddedig, yn frwdfrydig, yn gweithio’n galed ac yn aelod poblogaidd a gwerthfawr o’r tîm”, meddai ei chyflogwr Archwilio Cymru.

Wedi iddi ennill ei Phrentisiaeth AAT Lefel 3 gyda rhagoriaeth, mae’n gweithio erbyn hyn tuag at Ddiploma Lefel 4 mewn Cyfrifeg Proffesiynol.

Roedd yn aelod o dîm grŵp enillodd fedal aur yn y Gystadleuaeth Sgiliau gan fynd ymlaen i gystadlu yn rownd derfynol WorldSkills y Deyrnas Unedig ym mis Tachwedd.

Mae Eleri hefyd yn cefnogi ei chyd-brentisiaid ar Gynllun Cyfaill yn y gwaith ac hefyd wedi gwirfoddoli i fod yn farsial tân ar gyfer clwstwr Gogledd-Orllewin Archwilio Cymru. Yn ei hamser sbâr, mae’n drysorydd i’r elusen Y Gorlan ac yn athrawes Ysgol Sul.

Mae’n siaradwr Cymraeg, yn barod am unrhyw her, yn chwaraewr tîm go iawn ac yn awyddus i ddatblygu ei gyrfa.