GWOBRAU PRENTISIAETHAU 2023

Dyrchafwyd Gareth i fod yn reolwr bar cynorthwyol yn yr Inn at the Bay ers iddo gwblhau ei Brentisiaeth Sylfaen mewn Lletygarwch (Lefel 2).

Wedi iddo weithio yn y Trearddur Bay Hotel am bedair blynedd, penderfynodd fynd am y cymhwyster er mwyn datblygu ei hun o fewn y cwmni ac i ennill ei Drwydded Personol.

Trwy waith caled ac ymroddiad, daeth yn un o’r dysgwyr cyntaf i gwblhau’r cymhwyster newydd ar amser, er gwaethaf heriau’r pandemig, ac nawr mae am symud ymlaen i’r prentisiaeth Lefel 3.

Mae Gareth wedi derbyn cyfrifoldebau ychwanegol, ac mae’n parhau i ddysgu a hyfforddi aelodau newydd o’r staff o fewn ei adran. Mae hefyd wedi addasu’n dda i’r beichiau o fod yn dad newydd ac arwain tîm.

Mae’r cogydd Jack yn credu ei fod wedi dod o hyd i’w wir alwedigaeth drwy ddysgu tra’n gweithio. Cwblhaodd ei fframwaith prentisiaeth cyfan o flaen amser, yn fuan ar ôl penderfynu mai nid prifysgol oedd y lle iddo fo.

Wedi iddo ddilyn Prentisiaeth Sylfaen mewn Coginio Proffesiynol, wedi’i ddarparu’n ddwyieithog, mae nawr wedi dechrau Prentisiaeth Lefel 3.

Yn siaradwr Cymraeg, penodwyd ef yn Lysgennad Prentisiaeth i’r Coleg Cymraeg Cenedlaethol a Ffederasiwn Hyfforddiant Cenedlaethol Cymru yn 2022 ac mae o wedi ymddangos mewn arddangosiadau coginio fideo i hyrwyddo’r defnydd o’r iaith yn y gweithle.

Dechreuodd Jack ar ei daith brentisiaeth yn Sage Kitchen ym Mhorthaethwy, ond mae’n gweithio ym mwyty Sheeps and Leeks yng Nghaernarfon erbyn hyn.

Mae Victoria wedi mynd o fod yn fam llawn-amser i fod yn reolwr arlwyo yng Ngholeg Myddleton yn Sir Ddinbych, gyda chymorth cwrs Prentisiaeth Sylfaen mewn Cynhyrchu Bwyd a Choginio (Lefel 2) a llawer o waith caled.

Dechreuodd weithio yn y coleg ym Mai 2021 fel cymhorthydd cegin, cofrestrodd am ei phrentisiaeth yn Chwefror 2022 a’i gwblhau chwe mis yn ddiweddarach tra’n gweithio llawn amser a gwneud amser i’w theulu. Gan ei bod yn ddyslecsig, addasodd ei ffordd o weithio er mwyn cyflawni ei chymhwyster.

Erbyn hyn, mae Victoria’n cyfuno ei Phrentisiaeth mewn Lletygarwch, Goruchwylio ac Arwain (Lefel 3) gyda rhedeg cegin brysur sy’n arlwyo ar gyfer mwy na 200 o fyfyrwyr a digwyddiadau arbennig. Mae ei chyflogwr yn ei disgrifio fel “ysbrydoliaeth”.