GWOBRAU PRENTISIAETHAU 2023

Disgrifiai Ysgol y Gogarth Ceri fel cymhorthydd dysgu ymroddedig sy’n cael “effaith eithriadol” ar ddatblygiad personol, cymdeithasol ac academaidd y plant.

Ochr yn ochr â’i chymhwyster Lefel 3 Cefnogi Dysgu ac Addysgu Mewn Ysgolion, mae wedi dod yn hwylusydd drwy’r Rhaglen Cymhorthydd Dysgu Eithriadol ac wedi cwblhau’r cymhwyster lefel-uwch Cymhorthydd Dysgu.

Dywed yr ysgol mai prif gryfder Ceri yw y gefnogaeth mae’n ei ddarparu i’r plant hynny sydd ag anawsterau cymdeithasol, emosiynol ac ymddygiadol. Mae’n darparu ystod o raglenni ymyrraeth ac yn cefnogi plant trwy ei defnydd o Makaton.

Mae’n ymroddedig i’w datblygiad proffesiynol hi ei hun ac yn gweld yr effaith mae hyn yn ei gael ar ei rôl yn yr ysgol. Mae wedi hwyluso hyfforddiant y Rhaglen Cymhorthydd Dysgu Eithriadol i gyd-weithwyr ar y staff ac yn rhannu ei gwybodaeth er budd eraill.

Uchelgais Katy, sy’n gymhorthydd dysgu, yw i fod yn athrawes. Wedi iddi gwblhau ei chymwysterau Lefel 3 Cefnogi Dysgu ac Addysgu a Lefel 2 Llythrennedd Digidol, mae’n mynychu’r brifysgol erbyn hyn i astudio Gradd Sylfaen Astudiaethau Plentyndod a’r Teulu.

Mae’n helpu’r athrawon yn Broughton Primary School i baratoi ar gyfer gwersi drwy baratoi adnoddau neu offer, ac yn awyddus i gwblhau unrhyw hyfforddiant sy’n cefnogi ei rôl.

Tra’n cwblhau ei chymwysterau, bu Katie’n ymchwilio, gwerthuso ac yn cyfathrebu gwybodaeth yn glir ar nifer o lwyfannau digidol gan gael profiad gwerthfawr o fewn yr ysgol.

Amlygwyd ffordd ymgysylltiol Ryan, sy’n gymhorthydd dysgu, o weithio gyda phlant ifanc fel cryfder yn arolwg diweddar Estyn i Saltney Ferry County Primary School.

Ymunodd Ryan â thîm blynyddoedd cynnar yr ysgol ym mis Medi 2021, pan ddechreuodd ar gymhwyster Lefel 2, ac mae wedi cynyddu ei sgiliau a’i hyder.

Disgrifiodd yr ysgol ef fel “ased gwych”, sydd bob amser yn barod am yr her nesaf – o ddyn cinio i arwr amser stori! Mae’r plant yn meddwl y byd ohono ac mae wedi dod yn fodel rôl gwrywaidd positif i’r bechgyn.

“Mae gan Ryan ffordd mor hyfryd gyda’r plant. Mae rhai pethau na ellir eu haddysgu, ac roedd hyn i’w weld yn glir pan ymunodd Ryan â’n tîm yn y lle cyntaf,” meddai’r ysgol.

Mae’n cefnogi grwpiau o blant gyda sgiliau sylfaenol ac yn eu hymgysylltu gyda gweithgareddau hwyliog lle nad ydynt yn sylweddoli eu bod yn dysgu.